نصائح للوقاية من كورونا

بوست طويل شوية بس حاولت أذكر فيه بلغة بسيطة علي قدر الإمكان معلومات قد تكون مفيدة لبعض الناس عن ڤيروس/ وباء الكورونا و إزاي بيتنقل و إزاي ممكن نقلل العدوي و كمان حبة توقعات لما سيحدث خلال الأسابيع القادمة،

مبنية علي دراسات علمية و أكاديمية من خلال دراستي السابقة في جامعة واشنطن في قسم الصحة العالمية و شغلي العملي و الأكاديمي الحالي في جامعات أمريكية و منظمات دولية معنية بالصحة العالمية، و كذلك لآخرين...ما تيجوا نقرأ علشان نساعد نوصل الكلام ده لأسرنا و معارفنا و اكبر عدد من الناس

(مصادر المعلومات من مواقع عالمية تتبع الأمم المتحدة و الحكومة الأمريكية و كذلك مواقع بحثية تتبع جامعات عالمية مرموقة كلها مذكورة في آخر البوست. أيضاً في توقعات شخصية مبنية علي دراستي و عملي الأكاديمي في مجال الصحة العالمية و الأمراض الوبائية و أتحمل تماماً مسئولية نشرها)

- حالياً، عدد الإصابات المتوقع وجودها في مصر يتراوح ما بين عدة آلاف و عشرات الآلاف 

- وزارة الصحة مش بتخبي عدد الحالات عن عمد ، بس معظم الحالات المصابة ما اتعملهاش تحاليل عشان مش كل حد حرارته ترتفع و يكح شوية محتاج يحلل (و ده فعلاً المتبع في كل الدول) وكمان في حالات مصابة كتيرة ما بتظهرش عليها أعراض مرضية (بس طبعاً  بتبقي معدية)

- منظمة الصحة العالمية مش حتخبي حاجة عشان خاطر الحكومة ، بس للأسف في تسفيه حتي هذه اللحظة من خطورة الموقف من جانب الحكومة غالباً بسبب قلة الخبرة المتعلقة بمواجهة الأوبئة العالمية و في رأيي الشخصي جهل القيادات بوزارة الصحة بحساسية الوقت في حالة وجود وباء عالمي

- عدد الإصابات المتوقع حدوثه كبير جداً و للأسف ممكن يوصل لملايين ، في مصر بس

- كل ١٠٠٠ شخص مصاب بيتوفي منهم ٢٠ ل ٣٥ شخص ، يعني أكتر من ١٠ ل ٢٠ ضعف اللي بيتوفوا من الإنفلونزا الموسمية، و النسبة ده في البلاد الغنية اللي عندها تجهيزات و  إستعدادات علي أعلي مستوي

-الڤيروس بيعيش علي الأسطح (ترابيزات، مكاتب، كراسي المواصلات، مقابض الأبواب و زراير الأسانسيرات، الكيبورد، او أي شيئ الڤيروس وصله) لمدة تتراوح ما بين ساعات لأيام 

- تطهير اليدين يا إما : (١) بغسل اليدين بالماء و الصابون لمدة لا تقل عن ٢٠ ثانية ؛ (٢) أو بإستخدام مطهر كحولي لليدين (هاند سانيتايزر) بشرط يكون تركيز الكحول فيه لا يقل عن ٦٠٪؜

- الڤيروس لو موجود علي اليدين لا يعني الإصابة لأنه مش بيدخل الجسم عن طريق الجلد

- الإصابة بتحدث عن طريق: (١) الشخص إيده عليها الڤيروس و بعدين بيحط إيده علي وشه (الفم، الأنف، العين) ؛ (٢) شخص ما تواجد بجانب شخص آخر مصاب و الشخص المصاب ده كان  بيكح أمامه

- أعراض الكورونا الأساسية أربعة: (١) إرتفاع درجة الحرارة و لو حتي إرتفاع طفيف ؛ (٢) كحة جافة ؛ (٣) ضيق في التنفس اللي ممكن يؤدي ل (٤) صعوبة فالتنفس

- لو شخص ما مصاب برشح (إفرازات أنفية) و إلتهاب فالحلق و / أو عطس ، إحتمال كبير ما يبقاش بسبب كورونا

- صغار السن و الشباب الغير مصابين بأمراض مزمنة ، لو أصيبوا بالكورونا غالباً بتبقي الإصابة يا إما بدون أعراض أو أعراض خفيفة زي إرتفاع  في حرارة الجسم و كحة جافة

- الأكثر عرضة لمشاكل صحية خطيرة هم : كبار السن و الحوامل و مرضي الأمراض المزمنة و اللي بيحتاجوا أدوية لتثبيط المناعة ، و ده لأن الفئات المذكورة هي الأكثر عرضة للإصابات التنفسية الشديدة وصولاً لفشل بوظائف الرئة

   (أمثلة للأمراض اللي الإصابة بالڤيروس قد تكون خطيرة في حال تواجدها: السكر ، أمراض قلبية ، أمراض تنفسية ، أمراض مناعية، او المرضي اللي بياخدوا أدوية تثبط الجهاز المناعي زي الأدوية بتاعت أمراض المناعة الذاتية -مثل الذئبة الحمراء و إلتهاب المفاصل الروماتيزمي - او أدوية ما بعد زراعة الأعضاء)

- ال case-fatality ratio ، اللي الإعلام في مصر و العالم بيسميها mortality rate  و يقصدوا بيها نسبة الوفاة من أعداد المصابين  ( ال Mortality rate ده مش تسمية علمية صحيحة من الإعلام) هي زي ما ذكرت سابقاً ٢ ٪؜ ل ٣.٥٪؜ 

- النسبة ده بتتحسب بقسمة [عدد اللي توفوا من كورونا علي عدد اللي أصيبوا بالكورونا] x ١٠٠

- طبعاً في ناس ماتت و حتموت من الكورونا من غير ما نعرف ، سواء في مصر أو في العالم، بس أكتر فالدول اللي ما عندهاش نظام قوي لتسجيل أسباب الوفاة ، زي مصر و الدول النامية

- بس برضو في ناس كتير حيجيلها كورونا بدون أعراض او بأعراض بسيطة و مش حتحلل (عشان ما فيش حتي الآن داعي علمي لعمل تحليل لكل شخص مشتبه بإصابته) و حتي لو أي دولة قررت تحلل لكل حالة يشتبه فيها للأسف ما فيش إمكانيات لعمل تحاليل لأعداد بالملايين سواء فالصين، امريكا، او حتي أوروبا، فما بالك بمصر

- امتي تشتبه في إصابتك ؟ لو مصاب بيبقي يا إما عندك عَرَضْ او أكتر من حرارة، كحة ناشفة، ضيق بالتنفس/ صعوبة بالتنفس ، او السبب التاني اللي علي أساسه ممكن تشتبه في إصابتك إنك تكون عارف إنك تعرضت بصورة مباشرة لشخص مصاب (سلام باليد ثم وضع اليد علي الوجه، تلامس ، تقبيل، او تعرضك لكحة الشخص المصاب) ، او أخيراً تواجدك في مكان مغلق (زي مكتب/ فصل/ محل عمل/ سيارة/ أسانسير) و مسكت أشياء من المحتمل ان تكون اتمسكت او استُعملت من شخص مصاب ، عشان زي ما مذكور فوق ، الڤيروس بيعيش علي الأسطح من ساعات لأيام

- تعمل ايه لو حاسس إنك ممكن تكون مصاب؟ أول حاجة تعملها انك تقعد في بيتك و تحاول بقدر الإمكان إنك تعزل نفسك عن الناس.. أشرب مياه و كُل عادي. لو في حرارة خد خوافض حرارة (الأسبرين ممنوع)

- امتي تروح المستشفي المخصصة لإستقبال حالات الكورونا في محافظتك؟ حالة واحدة بس بتروح للمستشفي المخصصة من وزارة الصحة لإستقبال حالات الكورونا في كل محافظة: الحالة ده هي لما بتبدأ تلاحظ ظهور ضيق او صعوبة بالتنفس فقط لا غير ...أوعي  تروح عيادة خاصة لأي طبيب او مستشفي خاصة او حتي مستشفي حكومية غير مؤهلة ، ما فيهاش هزار!! لو مصاب و رحت مكان من دول إحتمال تعديلك العشرات في سكتك

- وزارة الصحة أعلنت عن أسماء المستشفيات المجهزة لإستقبال الحالات في كل محافظة، فرجاء و توسل كمان مرة، بلاش تروح أي عيادة او مستشفي غير من المستشفيات المجهزة لإستقبال حالات الكورونا عشان مليون فالمائة حتأذي جامد ناس كتير في سكتك لدرجة انك  من كل ١٠٠ حتعديهم، عالأقل ٢ او ٣ حيتوفوا

- هل لبس الماسك ضروري ؟ لبس الماسك ضروري في حالتين : أنك عندك كورونا (او عندك أعراض قد تكون بسبب كورونا، زي إرتفاع الحرارة و كحة جافة) و لسبب قهري لازم تكون في مكان ما في ناس غير مصابة و ممكن يتعدوا منك. 

السبب التاني إنك بتقدم خدمة طبية في مستشفي أو حتي في عيادتك الخاصة و في إحتمالية لتعرضك لحالات مصابة او مشتبه بإصابتها (لازم تلبس ماسك)....بمعني لو ما فيش إشتباه في كورونا او حللت و التحليل سلبي و/او مش شغال مع مرضي، الماسك مالوش لازمة

- لو تساهلت علي أساس إنك لسه شباب و صحتك كويسة و فاكر إن كورونا آخره معاك شوية حرارة و كحة ، فلازم تراجع نفسك. فعلاً قد يكون تأثير كورونا عليك بسيط بس غالباً و بدون قصدك حتعدي ناس كتير حواليك و غالباً حيبقي منهم ناس من أسرتك و عيلتك و أكيد منهم ناس سنهم كبير

- بعد سن ال ٦٠ ، كورونا مشاكله بتبقي كبيرة لأن في حالات كتيرة الموضوع مش بيبقي إرتفاع فالحرارة و الكحة ، و لكن المشكلة الأخطر هي ضيق بالتنفس او حتي صعوبة بالتنفس، وصولاً لفشل تام لوظائف الرئة 

- المشكلة ان لما مصاب بيوصل للمرحلة ده بيبقي محتاج يروح المستشفي و ياخد أكسچين و غالباً حينتهي الحال علي جهاز تنفس صناعي لمدة أيام و أسابيع

- كام عدد أجهزة التنفس الصناعي في بلد بحجم مصر ؟ عدد أجهزة التنفس الصناعي مش حتزيد عن ٤٠ ألف مثلاً و في معظم الوقت كلهم مشغولين بمرضي تانيين من مختلف التخصصات محتاجين يبقوا علي أجهزة التنفس الصناعي ده

- طيب ايه اللي حيحصل لو عشرات أو مئات الآلاف احتاجوا في فترة الكام أسبوع الجايين انهم يتحطوا علي أجهزة إعاشة/ تنفس صناعي ؟ للأسف غالباً كلهم حيتوفوا و لن ينجو منهم واحد

- أعتقد إن الناس لازم تقعد أولادها فالبيت من المدارس و الحضانات و كذلك كل الكليات تقفل في أسرع وقت ممكن، بالإضافة للمصالح الحكومية اللي ممكن أعمالها تستني كام أسبوع

(توضيح: البوست ده منشور قبل قرار تعليق الدراسة)

- لازم الناس كلها بلا إستثناء  تبطل تتجمع بدون وجود سبب قهري..قهاوي، فسح، أعياد ميلاد، مولات، ماتشات، حتي الصلاة برة البيت 

- لو عندك أولاد ، أعتقد ان طول ما أنت لسه بتروح شغلك و عيالك بتروح المدرسة، ما فيش داعي خالص تزور حد كبير فالسن من عيلتك حتي و لو كان والديك  خصوصاً لو انت أو حد من أسرتك عنده إرتفاع بدرجة الحرارة او كحة 

- لو لازم تروح تزور حد كبير فالسن و طول ما انت بتشتغل و عيالك بيروحوا حضاناتهم و مدارسهم و كلياتهم ، يا ريت تلبس ماسك و تستخدم مطهر لليد (سانيتايزر) قبل ما تدخل عليهم خصوصاً لو عندك حرارة أو كحة ... كمان لازم تتأكد أن مطهر اليد نسبة الكحول فيه لا تقل عن ٦٠٪؜ ، لأن لو تركيز الكحول أقل من كده حيبقي مش فعال و مش حيقضي عالڤيروس اللي ممكن يكون علي إيدك

- لو عندك كحة، ما تكحش في إيدك و لا حتي تبعد وشك عن الناس و تكح، ده غلط جداً ... كُح في 💪🏽 (مش عارف الناحية الداخلية من الكوع اسمها ايه باللغة العربية)... و لو كحيت في منديل، لازم تتخلص منه بعدها علي طول

- كمان مرة ، رفقاً بكبار السن عشان هم أكتر ناس حتتأذي ، فيا ريت تقللوا من تعريضهم للإصابة بسبب عدم إتباع التدابير الإحترازية اللي العلم أثبت جدواها

أخيراً، برجاء مشاركة المواقع الإلكترونية الآتية مع معارفك عشان الناس تعرف طرق إنتقال الڤيروس و إيه اللي يتعمل علشان نمنع العدوي:

١- موقع منظمة الصحة العالمية (WHO) باللغة العربية (الموقع ب ٦ لغات): حيبقي مفيد جداً للي عايزين يتابعوا الأخبار باللغة العربية و يراجعوا كل سبل الوقاية اللي ذكرتها  من قبل فالبوست ده.

٢- اللي عايز أكتر مصدر موثوق فيه بالإنجليزي موقع "مراكز مكافحة و منع الأمراض" (CDC)  الحكومي الأمريكي.

٣- اللي عايز موقع أكاديمي محترم بيقدم  خدمة الخريطة التفاعلية لعدد حالات الإصابة بالكورونا في كل بلد و بيتم فيه تحديث الخريطة بصورة دورية: موقع جامعة چونز هوپكنز (Johns Hopkins).

برجاء تفهم أن أي موقع او أي بوست عالفيسبوك او تويتر او ڤيديو مش حيكون أصح أو أضمن من موقع منظمة الصحة العالمية (WHO) و موقع "مراكز مكافحة و الوقاية من الأمراض" (CDC) الحكومي الأمريكي.

أي كلام تاني من أي موقع إخباري أمريكي أو أوروبي (حتي لو كان أسم الموقع أو الجريدة بالإنجليزي The Guardian او Daily Mail او  Independent او Washington Post, CNN, The Hill ,BBC... إلخ) ، كل ده غير دقيق و غير علمي و غير معترف بيه نهائيا في أي مؤسسة علمية أو أكاديمية ، فالعالم كله. 

روابط (لينكات) ال ٣ مواقع المذكورة أعلاه تم إضافتها  في الپوست التالي المنشور يوم السبت ١٤ مارس. 

و شكراً